• Dr. Mulugeta Mengist

ትምህርት ለምን?

Updated: Nov 17, 2019

ትምህርት ሚኒስቴር የፖሊሲ ለዉጥ አደርጋለዉ እያለ ነዉ፡፡ አንዳንድ የፖሊሲ አቅጣጫወችን እኔም በዚሁ ልጠቁም፡፡

  1. መጀመሪያ የትምህርት አላማ ምንድን ነው በሚለዉ ላይ መተማመን አለብን። የትምህርት አላማ፥ ማሽን ወይም ግብአት ማምረት መሆን የለበትም። አንድ እውቅ የትምህርት ለዉጥ አቀንቃኝ እንዳለዉ፥ የዘመኑ ትምህርት ለኢንዱስትሪዉ የሚሆን ሰራተኛ ማምረት ነዉ። እንደ እኔ እምነት የትምህርት አላማ፥ በተለይ ደግሞ የከፍተኛ ትምህርት አላማ አምስት ነዉ (ተጨማሪ ሊኖር ይችላል)። አንደኛ፥ ተማሪዉን ነጻ ማዉጣት ነዉ። እራሱን፥ ዉስጡን የሚያዳምጥ፥ የራሱ ወኪል የሆነ ሰዉ መፍጠር ነዉ። ሰዉነት ጸጋም፥ እርግማንም ነዉ። እርግማኑ ውርንጭላ አለመሆናችን ነዉ። አጎቴ ጋር ሄጄ፥ እርጉዝ የነበረችዉ አህያ፥ ካንድ ሰአት በኋላ ተመልሼ ብመጣ ወልዳ ጠበቀችኝ። የገረመኝ ረጅም ጊዜ አለማማጧ አይደለም። የዉርንጭላዉ ጉዳይ እንጂ። ተስተካክሎ ቆሞ ይበላል። ከሰዉ ጋር አስተያየዉት። በሕግ እንኳን 18 አመት እስኪሞላው ድረስ የተከበረዉ የሰዉ ልጁ የሚያደርገዉን አያዉቅም ተብሎ ይታሰባል። የሰዉ ልጅ ሳይበስል ነዉ የሚወለደው። የእርግዝና ጊዜዉ ዘጠኝ ወር ሳይሆን 18 አመት መሆን ነበረበት። ሆኖ ቢሆን፤ የህዝብ ቁጥርም አያሳስበንም ነበር። ችግሩ በዝጠኝ ወር መወለድ ነበረበት። ያለዚያ እሱም እናቱም ይሞቱ ነበር። ለዚህ ማካካሻዉ ለረጅም ጊዜ ጡረተኛ መሆኑ ነዉ። ለቤተሰብህ የምታደርገው ድጋፍ እዳ መክፈል የሚሆነዉ ለዚህ ነዉ። ችግሩ በዚህ የመጀመሪያዉ የጡረታህ ዘመንህ፥ በፍቅርና በሌላ ምክንያት የምትሰበስበዉ ጓዝ ነዉ። ይህ ጓዝ እይታህን፥ ምልከታህን፥ ማመዛዘንህን ይበርዘዋል። በቤተሰብህ እና በማህበረሰቡ የለመድከዉ ነገር ሁሉ ተፈጥሮህ ይምስልሃል። ስለዚህ የከፍተኛ ትምህርት ሚና አንተን ከዚህ ነፃ ማዉጣት መሆን አለበት። አንተን ዳግም መዉለድ።

  2. ሁለተኛ፥ የከፍተኛ ትምህርት አላማ እውቀትና ክህሎት ማስጨበጥ መሆን የለበትም። እሱ ድሮ ቀረ። አስራ ስምንት አመት ተምረህ ሰባ አመት መቀለብ። አሁን ሁሉ ነገር በየሁለት አመቱ የሚቀየር ነዉ። እድሜ ለመገናኛ እና መረጃ ቴኬኖሎጂ። ስለዚህ እውቀትን ሳይሆን፥ የመማርና የማወቅ ችሎታን ማስጨበጥ አለበት። እንዴት መረጃን ማግኘት ትችላልህ? መገምገም ትችላለህ?

  3. ሶስተኛ በተለይ ለኛ አገር፥ የከፍተኛ ትምህርት አላማ ተማሪዉን የመስኩ እውቀት የደረሰበት አለም አቀፍ ደረጃ/ወሰን/ጥግ ድረስ ማድረስ ነዉ። ታሪክ ሳይሆን ዘመናዊነትን ማስተማር ነዉ። የ2000 አመተምህረት መፅሃፍት እየተጠቀሙ ይህን ማድረግ አይቻልም

  4. አራተኛ የከፍተኛ ትምህርት አላማ፥ ተማሪዉን ከብዝሃነት ጋር ማስተዋወቅ ነዉ። ከብዝሃነት ጋር ማስተዋወቅ፥ ድንቆርናን ያጠፋል። እንዲሁም የመገምገም ችሎታን ይገነባል። የምናወቀዉን እና የለምድነዉን ነገር የቃልኪዳኑ ታቦት አድርጎ ከመቁጠር ያድነናል።

  5. አምስተኛ፥ የከፍተኛ ትምህርት አላማ ተፈላጊ እና ዘመን ተሻጋሪ እሴቶችን የማለማመድ መሆን አለበት።

  6. እናንተ ጨምሩበት። ሜጀር ማይነር መምረጥ ግን ዋናዉ አይመስለኝም።

7 views
  • @insights.of.jaaj

©2019 by fujaaj. All rights reserved.