• Dr. Mulugeta Mengist

መገበያያ ገንዘብህ ምንድን ነው?

Updated: Nov 17, 2019



የዛሬ 15 አመት ቤልጂም አገር ስማር፥ አብሮ ተማሪየ የሆነው ፈረንሳዊ የነገረኝን አልረሳውም።

አዉሮፓ ውስጥ በማህበራዊ መስተጋብሮች ሃይማኖታዊ አርእሶች አይነኬ ናቸው። ሃይማኖት የግል ነው ተብሎ ስለሚታመን። ለነገሩ ቤተክርሲያኖቻቸውን ባቡር ጣቢያ፥ ምግብና መጠጥ ቤት እያደረጓቸው ነው። እንዲሁም የወግ ጓደኛህ ምን እንደሚሰራ እንጂ ምን ያህል ገንዘብ እንደሚያገኝ መጠየቅና ማውጋት ነውር ነው። ስለፓለቲካ ማውራት ትችላለህ።

ስለአሜሪካ ደግሞ እንዲህ አለኝ። አሜሪካኖች በማህበራዊ መድረኮች የወግ እርእስ ሃይማኖት ነው። ስለፓለቲካ ማውራት ነውር ነው። እንዲሁም የወግ ጓድህ ምን ያህል ገንዘብ እንደሚያገኝ እንጂ ምን እንደሚሰራ ማውራት ነውር ነው። ጡረተኞች “የዚን ያህል ዶላር ጡረተኛ ነኝ” የሚል ስቲከር ወይም ፒን ይለጥፋሉ። እውነት ነው? አሜሪካን የምታውቋት ንገሩን።

ግን ግን፥ ላይሆን የማይችልበት ምክንያት የለም። ንፋስ ትዘራለህ፥ አዉሎ ንፋስ ታጭዳለህ። ገንዘብ ከገበያ መሳሪያነት ተሻግሮ የስራ ምክንያት ሲሆን፥ ስራው ሳይሆን ገንዘቡ ሲሆን፥ ያኔ ግቡን ትተህ መሳሪያዉን እያመለክ ነው። ያኔ ገንዘብ ጣኦት ሆኗል።

የመገበያያ ገንዘብህ ምንድን ነው? ሃይማኖት? ብር? ፓለቲካ? ስራ?

እኛስ? መገበያያችን ምንድን ነው? ጣዖታችን ምንድን ነው? አንተና ቤትህ ማንን ታመልካላቹ?

ቋንቋችን ሁሉ ተቀይሯል። ግልጽ ማውራት ያስጠቃል። ስለዚህ ድብቅነትን ተለማምደናል። ቃላቶቻችን፥ አረፍተ ነገሮቻችን ሁሉ ቀፎ ሆነዋል። አምስት ደቂቃ አውርተን ምንም አላልንም። ያለበት ሁኔታ ነው። ጥሩ መነሳሳት ፈጥሯል። ችግሮች የሉም ማለት አይደለም። እና የመሳሰሉት።

ከእንግዳ ጋር ማውራት ከባድ ነው። በተለያየ ስልት የሰውየውን የብሄርን ማንነት ካላወቅን በቀር። ከደፈርን በቀጥታ እንጠይቃለን። ካልሆነ የት ተማርህ፥ የት አደግ፥ ቤተሰቦችን የት ናቸው እንላለን። አንዳንዱ ሌላ ሰው ጋር ደውሎ እከሌ ግን ብሄሩ ምንድን ነው ብሎ ይጠይቃል። ልክ በስጦታ ሰርፕራይዝ እንደሚያደርግ ሰው፥ የሚወደውን ነገር አውቆ፥ ገዝቶ ለመስጠት። ለማወቅ፥ ለመረዳት፥ ቢሆን ጥሩ ነው። እኔ ግን የሚመስለኝ ቅኝታችንን ለማስተካከል ነው። የመገበያያ ገንዘቡን ለማወቅ ነው። ጣቢያ ፍለጋ ነው። አጭበርባሪ ሆነናል።

ሰው ሲቀየመን፥ ምን አድርጌው ይሆን ብሎ ራስን መመርመር ቀረ። በብሄሬ ምክንያት ነው ብሎ ማመን ቀላል ሆነ። የግል ፅድቅና ሃጢያት ተመልካች አጡ።

አዎ ግሳፄ የሚገባኝ ግም ሰው ነኝ። ሁሉም ግን እንደዚህ አይደለም።

የዘራነው ምንድን ነው? እያጨድን ያለነውን ለማወቅ የዘራነውን እንመልከት። ትናንትን አይደለም። አምናን አይደለም። አስር አመት ወደ ኋላ አይደለም። ታሪክን ዞር ብሎ በእርጋታ መቃኘት፥ በታሪክ ላለመታሰር፥ ለመማር፥ ነጻ ለመውጣት ተገቢ ነው።

  • @insights.of.jaaj

©2019 by fujaaj. All rights reserved.